Енергетскиот систем на Украина го доживеа својот најтежок ден од масовниот прекин на електричната енергија во ноември 2022 година и ситуацијата останува „исклучително тешка“, изјави министерот за енергетика Денис Шмигал, цитиран од Ројтерс.
Шмигал, кој е и прв вицепремиер, рече дека тешкотиите се предизвикани од голем број фактори – постојано гранатирање, како и оштетување на опремата за производство и трансформаторите. Условите беа најтешки во Киев и околниот регион, како и во југоисточниот Дњепропетровски регион.
„Најтешкиот ден за електроенергетскиот систем во Украина од прекинот на електричната енергија во ноември 2022 година помина. Ситуацијата е исклучително тешка“, рече тој.
Градоначалникот на Киев, Виталиј Кличко, изјави дека 2.600 станбени згради сè уште се „без греење два дена по последните ноќни напади“, додека греењето е вратено во 600 згради. Тој додаде дека прекините во електричната енергија остануваат на сила сè додека целосно не се воспостави снабдувањето со вода.
Премиерката Јулија Свириденко изјави дека се вложуваат напори за обезбедување алтернативни извори на енергија и генератори за жителите на Киев.
