Студија објавена во списанието „Environmental Science and Pollution Research“ покажува дека рециркулацијата не треба да биде активна повеќе од 20 минути.
Постојат многу предупредувања за користење на климатизација, а ова е секако едно од најсериозните, а е поткрепено и со научни истражувања, пишува Revija HAK.
„Во вашиот автомобил има копче, кое активира функција што може да биде опасна ако е активирано долго време“, предупредува д-р Кристабел Акинола на Инстаграм.
Копчето за кое не размислувате е она за рециркулација на воздух. Значи, го користи истиот воздух во автомобилот наместо да внесува свеж воздух однадвор. Му помага на клима уредот побрзо да го лади автомобилот, а може да спречи и влегување на издувни гасови.
Но, ако оваа функција се остави вклучена предолго, може да биде опасна.
Во еден пост, докторот ја раскажува приказната за семејство од пет члена кои речиси го загубиле животот. Тие го пакувале автомобилот за патување, но не сфатиле дека едно од децата си играло со функциите на климатизацијата и случајно го притиснало копчето пред да тргнат.
„На патот, таткото забележал дека сите други заспиваат, а набргу потоа, и тој ја изгубил свеста и излетал од патот во канал. Сето тоа се случило затоа што детето го притиснало тоа копче“, пишува Акинола.
Кога рециркулацијата е вклучена подолго време, јаглерод диоксидот што го издишуваме се акумулира во возилото. Нивоата на кислород се намалуваат, заморот се зголемува, а времето на реакција се намалува. Колку повеќе луѓе има во автомобилот, толку е поголем ризикот.
Симптомите можат да се појават без предупредување. Студија објавена во списанието Environmental Science and Pollution Research покажува дека рециркулацијата не треба да биде вклучена повеќе од 20 минути, особено ако возите со повеќе луѓе во автомобилот. Нивоата на јаглерод диоксид брзо се зголемуваат.
Многу модерни автомобили денес имаат автоматизирани системи кои го детектираат квалитетот на воздухот и ја регулираат рециркулацијата, но треба да бидете внимателни. Ако прозорците почнат да се замаглуваат или ако се чувствувате уморни без причина, тогаш е крајно време да проверите кое копче е вклучено.
