Осум лица се уапсени во Србија за сексуално искористување на деца преку интернет.
Апсењата беа дел од долготрајната српска полициска операција „Армагедон“, а осуммината се осомничени за сериозни кривични дела поврзани со детска порнографија и експлоатација на малолетници.
Меѓу уапсените е еден државјанин на Руската Федерација и седум српски државјани на возраст од 24 до 64 години.
Во текот на подолг временски период, тие преземале, складирале и споделувале материјали создадени од експлоатација на деца за порнографски цели.
Тројцата осомничени создале лажни профили на социјалните мрежи и апликации, претставувајќи се како 12 и 13-годишни девојчиња за да контактираат со малолетници од кои потоа изнудувале експлицитни фотографии и видеа, објавува Блиц.
За време на претресите на станови и други простории, полицијата пронашла голема количина фото и видео материјал на електронски уреди на кои се прикажува сексуална експлоатација на деца и малолетници, објавува Дневник.хр.
Уапсените лица се донесени во обвинителството со кривични пријави, а целата операција е дел од меѓународните напори за борба против сексуалната експлоатација на деца на интернет.
