Судењето за монструозните убиства на 14-годишната Вања Ѓорчевска и 74-годишниот Панче Жежовски продолжува денеска во Кривичниот суд, кога се очекува обвинетиот Влатко Кешишев повторно да сведочи – овојпат соочен со Љупчо Палевски, кој во неговиот телефон бил мемориран како „Царот“.
На последното рочиште, Кешишев детално ја раскажуваше својата верзија на настаните, но само откако судот дозволи Палевски да биде изнесен од судницата. „Во негово присуство нема да зборува вистината“, рече адвокатот на Кешишев, повикувајќи се на страв и претходни притисоци.
Судијата Ивица Стефановски го прифати барањето, и Палевски со лисици на рацете беше изнесен. Тоа ја отвори можноста Кешишев да ја изложи својата приказна: од тоа како Палевски го вовлекол во партиското седиште, каде живееле заедно, до првите наредби – копање дупка кај Рудник, за која првично мислел дека е за злато.
Во своето сведочење, Кешишев тврдеше дека ништо не планирал, туку само извршувал задачи кои му ги давале Палевски и останатите. Возел, полнел гориво, чекав со запален мотор. Тврди дека само од слушање разбрал дека се работи за уцена, но не и за убиство – сè до моментот кога слушнал истрел кај Бразда и го видел Палевски со пиштол во рака.
Кешишев детално ги опиша сцените: затрупување на телото со земја, прикривање со ќебиња и отпад, фрлање на алатот покрај патот и палење на возилото. Откако се вратиле во партијата, на Фејсбук ја видел сликата на девојчето – и дури тогаш сфатил која била жртвата.
Денеска, Кешишев и Палевски треба да се соочат лице в лице – првото директно соочување откако Кешишев почна да сведочи.
