Сеуште никој сериозно не верува во тоа, но кинеските автомобили неизбежно ќе станат огромна сила на меѓународниот пазар. Извозот на автомобили од Небесната империја продолжува да расте со огромно темпо, а тоа е доказ дека моделите на локалните производители треба да се сфатат сериозно.
Најубедлив доказ за тоа е статистиката. Во 2021 година, обемот на продадени автомобили од Кина надвор од земјата изнесуваше 2 милиони единици. За споредба, во истиот период ширум светот се продадени речиси 67 милиони автомобили, од кои 26 милиони во самата Кина. Односно, сите други пазари потрошиле нешто повеќе од 40 милиони, од кои 2 милиони се извезени од Кина, само 5% од вкупниот број.
Но, кои се најголемите извозници за таа година? На прво место е Јапонија со 3,8 милиони автомобили, а на второ е Германија која на странските пазари испорача 2,3 милиони автомобили. Следна е Кина со 2 милиони, пред Јужна Кореја, чиј биланс беше 500.000 помалку.
Еве ги најновите податоци – во август и септември годинава извозот на кинески автомобили за прв пат надмина 300.000 единици, што е за 60% и 74% повеќе од истите месеци од минатата година. И уште поважно, тоа е веќе повеќе од репер на Германија. Така, во моментов, Кина стана вториот најголем извозник на автомобили по Јапонија.
Во првите три квартали, 2,1 милиони нови автомобили ја напуштија Кина ширум светот, а границата од три милиони до крајот на годината веќе не изгледа недостижна. А најинтересно е што во 2020 година обемот на кинескиот извоз изнесуваше само еден милион автомобили. И ако продолжи трендот на „додавање милион годишно“, Небесната Империја би можела да стане најголемиот светски извозник на автомобили до крајот на 2023 година.
Ова, се разбира, не значи дека сега на патиштата ќе има повеќе кинески автомобили отколку јапонски, германски или корејски. Овде зборуваме само за извоз, додека најголемиот дел од продадените автомобили се произведени во локални фабрики. Треба да се напомене дека производителите од Кина сè уште имаат малку фабрики во странство, но и тоа постепено се менува.
