Обвинението за трагедијата во „Клуб Пулс“ открива целосен безбедносен колапс и директни пропусти на агенцијата за обезбедување, што овозможило пиротехниката-причина за пожарот, непречено да биде внесена во објектот. Според обвинителството, агенцијата „Рубикон Секјурити Солушнс“ од Скопје работела без договор, без план и без да изврши каков било преглед на гостите.
Заедно со управителот Јане Јанчески , обвинети се и четворица вработени во агенцијата: Лазар Захариев, Стојанчо Димитриев, Мартин Георгиев и Ивица Грозданов.
Според обвинителниот акт кој го поседува 4NEWS.mk, пропустите биле повеќекратни:
- Работа без договор: Агенцијата „Рубикон“ и нејзиниот управител се товарат дека во текот на 2025 година воопшто немале склучено писмен договор за обезбедување со „Клуб Пулс“.
- Без безбедносна проценка: Пред да го преземат обезбедувањето на настанот со висок ризик, од агенцијата не извршиле задолжителна безбедносна проценка за условите во објектот, ризиците и плановите за евакуација. Не бил изготвен ниту задолжителниот План за обезбедување, кој требало да биде доставен на одобрување во надлежните органи.
- Ангажиран нелиценциран работник: Обвинетиот Ивица Грозданов бил ангажиран да врши физичко обезбедување иако воопшто не поседувал лиценца за таа дејност.
- Немало проверка на влез (за пиротехника): Обвинетите, распоредени пред влезот и во внатрешноста на клубот , не извршиле никаков преглед на лицата што влегувале. Тие не ги проверувале гостите ниту рачно, ниту со технички средства за да пронајдат предмети што можат да предизвикаат опасност. Обвинителството тврди дека со тоа „не го спречиле внесот, а со тоа и користењето на експлозивни материии пиротехнички средства од страна на членови на музичката група ДНК со кој бил предизвикан пожарот“.
- Немало проверка на лични карти (за малолетници): Обезбедувањето исто така не извршило никаква проверка на идентитетот на гостите. Со овој пропуст, тие овозможиле влез на бројни деца, односно лица кои не наполниле 18 години, во објект каде тоа е забрането.
Обвинението понатаму прецизира дека токму поради овие пропусти, сега покојниот Мартин Атанасовски успеал да ги внесе пиротехничките фонтани во објектот „без притоа да биде проверен, запрен или спречен“ од обвинетите од обезбедувањето.
Обвинетите од „Рубикон“ се товарат за кривично дело „Тешки дела против општата сигурност“
