Странски државјанин кој се наоѓа во затвор во Франција е еден од сторителот на кражбата на банка во Атина во 2008 година, кога биле одземени над четири милиони евра, а случајот грчката полиција го расчисти по 17 години.
Од грчката полиција соопштија дека за кражбата на филијалата на банка во населба во северниот дел на Атина за Велигден во 2008 година, бил користен методот „рифифи“, односно непознати лица преку прозор влегле во банката и одзеле пари и вредни предмети од централниот сеф и трезорите, чија вредност надминала 4.000.000 евра.
Со помош на прекуграничната соработка и споредување со базите на податоци на земјите кои ја спроведуваат Прумската конвенција, Управата за криминалистички истраги на грчката полиција успеала да идентификува 53-годишен маж, кој бил инволвиран во случајот, а моментално се наоѓа во затвор во Франција, додека пак за слични дела им е познат и на германските и на косовските власти.
Дополнително било откриено дека обвинетиот бил вмешан и во обид за кражба во филијала на банка во Атина во 2009 година, како и во кражба на сеф и банкомат во супермаркет на островот Крит во 2010 година.
Според грчките медиуми, 53-годишниот маж е со потекло од Косово.
