Норвешка денеска понуди големи површини на морското дно на Арктикот за истражување на минерали и има намера да додели лиценци на компании во првата половина на 2025 година, објави Министерството за енергетика.
Норвешка на тој начин би можела да стане првата земја во светот која ќе започне со комерцијално подводно ископување со надеж дека ќе извлече минерали потребни за соларни панели, ветерни турбини и батерии за електрични автомобили.
„На светот му се потребни минерали за зелената транзиција и владата сака да истражи дали е можно одржливо да се вадат минерали од морското дно на норвешкиот континентален гребен“, рече министерот за енергетика Терје Асланд во изјавата.
Екологистите започнаа правна битка
Прелиминарните официјални проценки покажуваат, според Владата, значителни акумулации на метали и минерали, од бакар до минерали од ретки земји.
Во јануари, норвешкиот парламент гласаше за отворање на околу 280.000 квадратни километри морско дно за истражување на минерали, што се протега од островот Јан Мајен до архипелагот Свалбард.
Владата денеска понуди области кои покриваат околу 38 отсто од одобрената површина, а ги избра врз основа на интерес за рударскиот сектор, соопшти Министерството за енергетика.
Екологистите имаат намера да ги оспорат плановите на владата на суд.
Областа понудена за истражување е „шокантно голема“ со оглед на предупредувањата на научниците за можното влијание врз чувствителните екосистеми, нагласи Гринпис во средата.
На планираното истражување се спротивставуваат и земји како Франција и Европскиот парламент, кои бараат глобален мораториум за подобро проучување на влијанието врз организмите во длабоките мориња.
Норвешката влада тврди дека почетната фаза на истражување ќе има минимално влијание врз организмите и дека компаниите ќе треба да добијат посебна дозвола за ископување.
