Саудискиот престолонаследник и де факто лидер Мохамед бин Салман го повика претседателот Трамп да ја продолжи војната против Иран, опишувајќи ја американско-израелската воена кампања како „историска можност“ за преобликување на Блискиот Исток, според извори брифирани од американски претставници, објавува „Њујорк тајмс“.
Во серија повици во текот на изминатата недела, принцот Мохамед му рекол на Трамп дека мора да инсистира на уништување на тврдокорната влада на Иран, објавува „Њујорк тајмс“. Принцот Мохамед, според изворите, тврдел дека Иран претставува долгорочна закана за Заливот што може да се елиминира само со отстранување на владата таму.
Различните ставови на Израел и Саудиска Арабија
Додека израелскиот премиер Бенјамин Нетанјаху исто така го гледа Иран како долгорочна закана, аналитичарите посочуваат на клучна разлика во целите. За израелските претставници, неуспешна иранска држава, преокупирана со внатрешни немири и неспособна да го загрози Израел, би претставувала победа.
Од друга страна, Саудиска Арабија го гледа таквото сценарио во Иран како сериозна и директна закана за безбедноста.
Сепак, високи претставници во саудиската и американската администрација стравуваат дека конфликтот би можел да излезе од контрола. Според нивните проценки, ако војната продолжи, Иран би можел да изврши уште поразорни напади врз саудиските нафтени постројки, додека САД би можеле да бидат заглавени во бескрајна војна.
Спротивставени пораки на Трамп
Во своите јавни настапи, Трамп испрати сосема спротивни пораки, наизменично сугерирајќи дека војната наскоро би можела да заврши и дека ќе има ескалација.
Во понеделник, претседателот објави на социјалните медиуми дека неговата администрација и Иран воделе „продуктивни разговори за целосно и конечно решавање на нашите непријателства“. Сепак, Иран негираше дека се во тек какви било преговори.
