Одлуките на Владата за ограничување на маржите и замрзнување на цените на дел од прехранбените производи се објавени во „Службен весник“ и стапуваат на сила утре, со што се очекува поевтинување на над 1000 производи.
Одлуките важат до 30 април и опфаќаат 102 групи производи, при што трговците мора да имаат најмалку 70% од овие производи на рафтовите.
🔹 Очекувано намалување на цените – во просек за 10%, освен за млеко, леб, брашно, јајца, масло, јогурт и кисело млеко, чии цени ќе останат исти или минимално ќе се намалат.
🔹 Горна граница за маржите – 5% за основни намирници (млеко, леб, брашно, јајца, масло, јогурт, кисело млеко), 10% за месо, шеќер, млечни производи, ориз, тестенини, конзервирана храна и 15% за средства за хигиена, свежо овошје и зеленчук, детергенти, бебешка храна, пелени, сапун и тоалетна хартија.
🔹 Замрзнати цени – осумте основни производи не смеат да надминат цената од 1 февруари 2025 година.
На одлуките реагираше новоформираната Комора на трговци, која повторно побара итна средба со премиерот и министерот за економија.
