Здружената новосадска опозиција побара оставка од премиерот на Србија, Милош Вучевиќ, министерот за градежништво, транспорт и инфраструктура, Горан Весиќ и градоначалникот на Нови Сад, Милан Ѓуриќ, поради трагедијата во која загинаа 14 лица кога тешка армирано-бетонска настрешница од реновирана зграда се урна врз нив во петокот на железничките станици во главниот град Војводина.
„Го поддржуваме протестот на граѓаните и бараме оставка од премиерот на Србија, министерот за градежништво и градоначалникот на Нови Сад. Бараме итно апсење и казнување на сите поединци чијашто невнимание, неодговорност и коруптивни дејствија резултираа со загуба на толку многу човечки животи, на кои Нови Сад не се сеќава од бомбашкиот напад“, се наведува во соопштението.
Тие го поддржаа одржувањето на граѓански протест во Нови Сад во вторник на 5 ноември во 18 часот во близина на железничката станица.
Оттаму додаваат дека бараат на јавноста да и биде достапен комплетниот договор со кинескиот инвеститор, како и документацијата поврзана со сите проекти кои се прогласени за од национално значење, а се кријат од јавноста.
Соопштението го потпишаа коалицијата НАДА за Нови Сад – Нови ДСС – ПОКС, Крени промени – Нови Сад, Србија Центар – БРАВО Нови Сад, Националното движење на Србија – Еколошко востание, Партијата за слобода и правда и Движењето за пресврт, Демократска партија, Движење на слободни граѓани и Зелен лев фронт, Граѓанска група херои – Миша Бачулов, Лига на социјалдемократи од Војводина – Војводина.
