Остатоците на маж чие тело било обезглавено и закопано со лицето надолу, можеби за да го спречат да стане од мртвите како вампир, откриени се во средновековна тврдина во Хрватска, објави британското издание Дејли Меил.
Скелетите на околу 180 луѓе се пронајдени на речиси 120 километри југоисточно од главниот град Загреб во тврдината Рачеша, за која се верува дека во минатото била центар на витезите Темплари. Еден од овие скелети, сепак, е особено импресивен, бидејќи се верува дека трупот бил ископан по првичното погребување, а главата му била отсечена за да се спречи да стане вампир, забележува изданието. Телото потоа било закопано со лицето надолу.
Хрватскиот археолог д-р Наташа Саркиќ коментира дека „начинот на кој било погребано телото не може да се објасни со никаква природна сила“, што значи дека секако се работи за човечка интервенција. Според неа, обезглавувањето се случило кога мекото ткиво сè уште било достапно.
„Ова значи дека некој отворил свеж гроб, внимателно го извадил черепот и го превртел телото. Мора да има причина за ова“, објасни Саркиќ.
Иако нежните, софистицирани вампири како Дракула на Брам Стокер или оние од „Интервју со вампирот“ се модерен изум, верувањето во бесмртните што цицаат крв всушност потекнува од предхристијанските времиња, забележува Дејли Меил.
Според д-р Шаркиќ, во словенските земји како Хрватска, луѓето силно веруваат во постоењето на вампири со стотици години. Таа се присети на случајот со хрватскиот селанец Јуре Грандо Алиловиќ, кој починал во 1656 година. а кој е заведен како вампир во тогашните историски архиви.
Во соседна Србија, исто така, има сличен случај – скелетот на Петар Благојевиќ, кој починал во 1725 година, бил пронајден запален и со колец забиен во срцето, бидејќи неговите соселани се плашеле дека е вампир. Слични „вампирски“ гробници се пронајдени и во Бугарија и Полска.
„Карактеристика на вампирите е нивното речиси невозможно уништување“, забележува д-р Саркиќ. „Поради оваа причина беа преземени превентивни мерки против трансформацијата на неодамна починатите во вампири.
