Почина уште едно лице од повредените во страшниот пожар во дискотеката Пулс во Кочани.
Се работи за повредениот 29-годишниот Александар Гавриловски од Пробиштип, кој беше еден од критичните пациенти сместени во болница во Литванија.
„Жална вест, сакам да информирам дека денеска во 11 часот почина и вториот пациент којшто се лекуваше во Литванија, 29-годишен којшто беше во критична состојба уште од почетокот. Беше упатен од Градска болница на 17-ти март. Неговата состојба беше тешка, а од 4 април се влошуваше уште повеќе, додека од вчера беше на дијализа“, изјави Арбен Таравари.
Посочи дека Гавриловски бил еден од потешките пациенти, со 35 отсто изгореници од трет степен, како и изгореници во дишните патишта.
„Александар Гавриловски имаше 35 посто изгореници од трет степен, изгореници во дишните патишта и беше еден од потешките пациенти. Другите двајца засега се критични, но во стабилна состојба. Се надеваме да бидат подобри“, рече Таравари.
Со ова бројот на загинати во оваа несреќа се зголемува на 61.
Претходно, во Литванија исто така почина и Александар Карадакоски чие тело е веќе стигнато во Македонија и утре ќе биде погребано.
