Погребот на папата Франциско ќе се изврши во сабота, 26 април 2025 година, со почеток во 10:00 часот, соопшти Канцеларијата за печат на Светата столица.
Во соопштението се нагласува дека погребната миса за римскиот бискуп ќе се отслужи на плоштадот Свети Петар, на првиот ден од традиционалниот деветдневен период на жалост за починатиот папа.
Погребната литургија ќе ја води кардиналот Џовани Батиста Ре, декан на Колеџот на кардинали.
Ватикан соопшти дека телото на папата Франциско ќе биде пренесено во базиликата Свети Петар во среда наутро, на 23 април, во 9 часот по локално време, каде верниците ќе можат да му оддадат последна почит до времето на погребот.
Папата моментално е погребан во ковчег во капелата на резиденцијата Санта Марта, каде што живеел во текот на сите 12 години од неговиот понтификат.
Папските погреби обично се свечени и раскошни церемонии, но папата Франциско минатата година побара неговото последно збогување да биде едноставно.
Тој ќе биде првиот папа по повеќе од еден век кој нема да биде погребан во криптата на базиликата Свети Петар, туку, според сопствената желба, во базиликата Санта Марија Маџоре во Рим – црквата во која се наоѓа неговата омилена икона на Богородица.
Тој исто така побарал да биде погребан во едноставен дрвен ковчег, наспроти вообичаената практика на троен ковчег (од чемпрес, олово и даб) во кој биле закопани неговите претходници.
