Несреќата во која учествуваше товарен брод со околу 4.000 возила на групацијата Фолксваген, кој се запали минатата недела, ќе го чини германскиот производител на автомобили најмалку 155 милиони долари, пишува Блумберг.
Од околу 438 милиони долари вредна стока на бродот Фелисити Ас, кој експлодираше во пламен кај брегот на португалските Азори, 401 милион долари е вредноста на автомобилите, според консултантската фирма Расел Груп.
Бродот бил натоварен со модели на Volkswagen, Porsche, Audi, Bentley и Lamborghini.
Mitsui OSK Lines Ltd, операторот на Felicity Ace, на својата веб-страница објави дека во понеделник наутро по локално време се очекува да пристигнат два големи шлепери со противпожарна опрема за да започнат со гаснење на пожарот.
Не е потврдено истекување гориво и бродот останува стабилен, соопшти транспортната компанија.
Пресметките на Расел Груп се засноваат на сценарио во кое сите коли на бродот биле изгорени. Според компанијата, вредноста на сите автомобили освен Фолксваген достигнува 246 милиони долари.
Американскиот економист Патрик Андерсон првично процени дека почетната загуба може да достигне 255 милиони долари, но потоа ја ревидира својата проценка нагоре на 282 милиони долари.
„Овие износи не ја вклучуваат загубата низводно кај дилерите“, рече Андерсон. „Тие, исто така, не вклучуваат никакви спасувачки, еколошки или други трошоци, ниту самиот брод, ниту платите на екипажот или трошоците на Португалецот кој учествуваше во спасувачката мисија“, додаде економистот.
Бродот е долг 198 метри и широк 32 метри. Изграден е во 2005 година и го вее знамето на Панама.
