Од утре се отвораат граничните премини во нашата земја, без никакви ограничувања, односно без ПЦР тестови и државен карантин од 14 дена кој што е на сила до денеска.
Но, што ќе се случува со оние кои во изминатите неколку дена влегле со негативен тест, и се наоѓаат во домашна изолација?
Владата го даде следниот одговор:
„Како што е познато, врз основа на препораките на Комисијата за заразни болести, Владата на 72 седница донесе одлука од петок, 26 јуни 2020 година, целосно да бидат отворени сите гранични премини за непречено движење на патници и возила без приложување на PCR тестови, и без упатување до домашна изолација или спроведување во задолжителен државен карантин.
Согласно оваа одлука, Владата му препорача на Државниот санитарен и здравствен инспекторат до петок, 26 јуни, да даде мислење за правната основа за престанок на важноста на издадените решенија за упатување во домашна изолација за лицата кои не се позитивни на КОВИД-19.
Престанувањето на важноста на издадените решенија исклучиво ќе важи за лицата кои овие решенија ги добиле на влез во земјата, а не и за лицата на кои им се издадени решенија за изолација врз основа на алгоритмот за утврдување на изложеност на КОВИД-19“, изјави од Владата.
Директорката на Државниот здравствен и санитарен инспекторат Ирина Сотирова-Бухова за ТВ21 рече дека се работи на правно финиширање на одлуката.
.