Иако заматеноста на водата во струшкиот водовод постепено се намалува, забраната за нејзино користење за пиење и натаму останува на сила. Локалните власти, во обид да најдат трајно решение за овој долгогодишен проблем, ангажираат дополнителна стручна помош од Скопје.
Градоначалникот Менди Ќура изјави дека се преземаат сите неопходни мерки, но дека точната причина за овој „феномен“ сè уште не може со сигурност да се потврди. Како можни фактори се разгледуваат природни појави, но и човечки фактор.
„Постојат сомнежи дека заматеноста може да е последица на земјотрес или пак резултат на ископувања во горниот дел на базенот кои биле вршени уште во 2020 година. За да ги елиминираме сите дилеми, во понеделник доаѓа приватна институција од Скопје која детално ќе утврди од каде доаѓа загадувањето“, истакна градоначалникот.
Дека состојбата не смее да се занемари, потврдува и Блинков од Државниот инспекторат за животна средина. Тој повлече паралела со потенцијалните опасности во Скопје (изворот Рашче), нагласувајќи дека секое загадување на изворите за питка вода е сериозна закана за јавното здравје.
„Секое загадување на изворите е опасно. Доколку се загрози главен извор, последиците се катастрофални – цели градови може да останат без вода за пиење“, предупредува Блинков.
Според последните мерења на Центарот за јавно здравје, параметрите на заматеност покажуваат тренд на опаѓање. Сепак, додека не се добијат неколку последователни чисти резултати и додека стручњаците не дадат „зелено светло“, водата од градскиот водовод во Струга може да се користи исклучиво како техничка вода.
Надлежните се надеваат дека во наредните неколку дена овој горлив проблем, кој се повторува со години, конечно ќе биде ставен под контрола.
