Американскиот претседател Џо Бајден им ги ублажува казните на речиси 2.500 лица осудени за ненасилни злосторства поврзани со дрога. Ова се случува три дена пред да ја напушти функцијата.
Бајден рече дека престапниците „одлежуваат несразмерно долги казни во споредба со казните што ќе ги добијат денес според сегашниот закон, политика и практика“ и дека неговите постапки ќе ги исправат „историските грешки“.
Помилувањето влијае на поединци „кои добиле долги казни врз основа на дискредитирани разлики помеѓу крек и кокаин во прав, како и застарени отежнувачки фактори за прекршоци поврзани со дрога“.
Џо Бајден рече дека преку законите од последниве години, Конгресот признал дека „време е да се изедначат разликите во казните“.
Веста доаѓа откако претседателот во заминување им ги ублажи казните на 37 од 40 федерални осуденици на смрт и издаде серија помилувања во декември, вклучително и за неговиот син Хантер Бајден.
Американскиот претседател рече дека помилувал и ублажил повеќе казни „од кој било друг претседател во историјата на САД“.
„Оваа акција е важен чекор кон исправување на историските грешки, исправање на разликите во казните и давање можност на заслужните луѓе да се вратат во своите семејства и заедници откако ќе поминат премногу време зад решетки“, рече претседателот во петокот.
„Горд сум на моето досие за помилување и ќе продолжам да се залагам за дополнителни случаи за ублажување и помилување“, додаде Бајден.
