Во сабота ќе се одбележи 13 годишнина од монструозното убиство на пет лица кај Смилковското езеро.
Настанот е закажан за 12 часот во скопската населба Радишани, кај Крстот.
„Ве повикуваме и покануваме сите кои што сте во можност да дојдете да им оддадеме почит на нашите браќа Кире, Цветанчо, Александар, Филип и Борче. Затоа што нашата почит ја заслужија, затоа што никогаш нема да бидат заборавени“, велат од организацијата.
На 12 април 2012 година кај езерото во атарот на селото Смилковци е извршено монструозно убиство на пет лица со огнено оружје.
Убиените се четири момчиња на возраст од 18 до 21 година од населбата Радишани: Филип Славковски, Александар Наќевски, Цветанчо Ацковски и Кире Тричковски, како и Борче Стевковски, 45 години, од селото Црешево.
Убиствата се случиле меѓу 19:30 и 22:30 часот кога биле најдени телата на убиените.
Обдукцијата врз убиените покажало дека во нив е пукано од три типа огнено оружје, затоа што биле најдени чаури од три различни типа муниција, што сугерира дека има повеќе од еден извршител на чинот.
