Откако синоќа пристигна на состанок во Европската комисија (ЕК), српскиот претседател Александар Вучиќ ѝ рече на претседателката на ЕК, Урсула фон дер Лајен, дека „штотуку добил порака од Москва“, објавија српските медиуми.
Откако зборовите на српскиот претседател беа снимени на микрофоните, фон дер Лајен го прекина додека се приближуваа кон просторот одреден за изјави и фотографии пред медиумите.
„Добро, да почекаме“, одговори фон дер Лајен, давајќи му знак на претседателот на Европскиот совет, Антонио Коста, да застане до неа за фотографијата.
Снимениот звук и слика брзо го привлекоа вниманието на европските новинари, особено поради чувствителниот момент во односите меѓу Европската Унија и Русија, како и поради честите критики од Брисел за непочитувањето на заедничката надворешна политика на ЕУ од страна на Србија, јавува регионалниот телевизиски канал En1.
Сè уште не е познато на што конкретно се однесува пораката на Вучиќ од Москва, а ниту една страна официјално не коментираше што се случило, објавува и хрватскиот весник „Јутарни лист“.
Вучиќ синоќа во Брисел присуствуваше на работна вечера со Урсула фон дер Лајен и Антонио Коста.
„Ги поздравивме чекорите на Србија за диверзификација на своите енергетски извори и правци и за намалување на нејзината зависност од Русија, чија несигурност е постојано демонстрирана“, рече фон дер Лајен за нејзините разговори со Вучиќ во нејзиниот пост „Х“.
Претседателот на Управниот одбор на Центарот за европски политики, Срѓан Мајсторовиќ, кој е поранешен член на српскиот преговарачки тим со ЕУ, во својата објава во „X“ коментираше дека зборовите на фон дер Лајен значат дека е „крајно време Србија да ги прекине енергетските врски со Русија“.
Видеото со пораката од Москва доаѓа во време кога на Србија ѝ се заканува нафтена криза, бидејќи сè уште не е познато кој ќе го купи рускиот мнозински удел во српската нафтена компанија НИС.
Од 9 октомври, НИС е под санкции на САД поради војната во Украина, а од почетокот на годината американските власти бараат целосно повлекување на рускиот капитал од компанијата.
