На енергетската трансформаторска станица која ја поседува бразилската компанија Eletrobras денеска избувнал пожар, што предизвикало прекин на струјата во повеќе сојузни држави на Бразил, соопштија официјални лица, а пренесува Reuters.
Инцидентот довел до целосно исклучување на оптоварување од околу 10.000 мегавати (MW) и влијаел на повеќе од милион корисници.
Пожар во реакторот
Пожарот се случил во реакторот на трансформаторската станица во јужниот дел на земјата, што довело до запирање на производството и исклучување на целата регија која претходно извезувала околу 5000 MW електрична енергија во рамките на Бразил, изјави националниот оператор на системот ONS.
Во регијата Јужен Бразил загубата на оптоварување изнесувала приближно 1600 MW, додека во другите региони автоматските заштитни механизми исклучиле дел од оптоварувањето за да се воспостави рамнотежа во системот. Регијата Североисток имала прекин од околу 1900 MW, регијата Север 1600 MW, а регијата Југоисток 4800 MW.
„Прекин на струјата е изолиран настан“
Министерот за рударство и енергија на Бразил, Александре Силвеира, го нарече прекинот на струјата изолиран настан, кој не е последица на недостиг на енергија, туку на инфраструктурен проблем.
„Имаме поголема енергетска сигурност. Ова беше еднократен инцидент на кој ONS брзо реагираше“, изјави Силвеира во интервју за локална телевизија.
ONS соопшти дека обновувањето на опремата и оптоварувањето се извршило „без никакви опасности во првите неколку минути“, и дека целото оптоварување било вратено во нормала во рок од 2,5 часа. Дистрибутерите на електрична енергија низ целата земја, вклучувајќи ги Light и Enel Sao Paulo, пријавиле дека прекинот на струјата погодил најмалку 1,3 милиони луѓе.
Aê, @lightclientes, Jardim Metrópole e adjecencias completamente sem luz. #saojoaodemeriti #bomdiario #rjtv pic.twitter.com/H3PyXJXigv
— Luana (@luanacataldo) October 14, 2025
