Голем дел од САД се подготвуваат за екстремни временски услови, од топлотни бранови на југ, до невообичаено студено време на северозападниот дел на Пацификот, до можен снег на Карпестите Планини.
По големите поплави во Флорида, таа држава и многу други се подготвуваат за интензивен топлотен бран. Облаци од тропска влага ќе стигнат до централниот заливски брег во текот на следните неколку дена, со обилни дождови кои се очекува да започнат во понеделник наутро, според Националната метеоролошка служба.
Синоптичарите соопштија дека заканата од обилни врнежи во Флорида се намалува, но понатамошните врнежи може да предизвикаат локализирани поплави. Некои области меѓу Мајами и Форт Лодердејл се под вода во последните денови поради обилните дождови.
Синоптичарите велат дека се можни поројни поплави меѓу источна Небраска и северниот дел на Висконсин оваа вечер, како и силно невреме низ делови од источна Монтана во Северна и Јужна Дакота.
Невремето што се случи се совпадна со почетокот на сезоната на урагани, за која се предвидува дека ќе биде меѓу најактивните оваа година, врз основа на претпоставката дека климатските промени го зголемуваат интензитетот на бурите.
Со повлекување на поплавите во Флорида, температурите денеска се зголемија низ поголемиот дел од јужниот дел на САД.
Во Атланта, каде за денеска и недела се предвидуваат температури од околу 38 Целзиусови степени, градските власти отворија центар за ладење за да ги олеснат временските проблеми за локалното население.
Во западниот тексашки град Ел Пасо, денеска се очекуваше максималната температура да се приближи до 40,6 степени Целзиусови, а Националната метеоролошка служба издаде предупредување за топлина до понеделник наутро за регионот. Градот отвори пет центри за разладување кои ќе работат секојдневно до понатамошно известување.
Националната метеоролошка служба соопшти дека температурите во Феникс, каде што беше на сила предупредувањето за прекумерна топлина, попладнево ќе достигнат 45 степени Целзиусови.
Температурите во средноатлантскиот регион и Нова Англија најверојатно ќе го достигнат врвот следната недела.
САД имаа најмногу топлотни бранови минатата година, а на југ и југозапад, минатата година беше најлошата досега, според Националната администрација за океани и атмосфера.
Топлотниот бран следната недела ќе се засили во недела во централните делови на земјата пред да се прошири на исток, соопшти Националната метеоролошка служба, при што екстремните горештини најверојатно ќе ги соборат дневните рекорди во некои области. На многу места топлотниот бран би можел да трае цела недела и во текот на наредниот викенд, најавено е.
