Во најголемата судница во рамките на КПУ Идризово, вчера започна долгоочекуваниот судски процес за трагедијата во дискотеката „Пулс“, каде животот го загубија 63 лица. Првото рочиште помина во знакот на емотивниот воведен говор на Обвинителството, кој предизвика аплауз кај семејствата на жртвите, но и низ правни превирања околу спојувањето на предметите и преводот на доказите.
Процесот, кој го води судијката Диана Груевска Илиевска, започна со силно полициско обезбедување и тензична атмосфера, при што родителите на жртвите со извици „убиец“ го пречекаа спроведувањето на првообвинетиот Дејан Јованов од притвор.
Обвинителот Јанев: „Злодело е самото постоење на клубот“
Највпечатливиот момент од вчерашното рочиште беше воведниот збор на обвинителот Борче Јанев. Тој истакна дека иако пожарот бил предизвикан од пиротехнички средства донесени од две лица кои сега се покојни (Виканите Панчо и Буцо), катастрофата не е резултат само на тој чин, туку на системска негрижа.
„Во ‘Пулс’ не изгоре само објектот – изгоре вербата дека системот штити, изгоре илузијата дека одговорните се тука да спречат. Злодело е самото постоење на клубот. Тој бил буре барут“, истакна обвинителот Јанев во својот говор.
Родителите на загинатите, кои присуствуваа во судницата, со аплауз ги поздравија овие зборови, препознавајќи во нив барање за вистинска правда.
Спојување на постапките и правни битки
Судечкиот совет донесе одлука за спојување на кривичните предмети за Агенцијата за обезбедување и за пожарот во „Пулс“ во една единствена постапка, со цел економичност и ефикасност на судењето.
Ова предизвика реакција кај одбраната. Бранителот Петре Шилегов реагираше дека „пречистениот текст“ на обвинението всушност претставува нов обвинителен акт и побара време за увид, нагласувајќи дека одбраната не е запознаена со редукцијата на доказите. Дополнително, адвокатите се пожалија дека дел од клучните докази, кои претставуваат комуникација меѓу службеници во Министерството за економија, се на албански јазик и не се преведени.
Судијката Груевска Илиевска ги пресече овие барања со решение дека интегрираниот текст не менува ниту едно дејствие или квалификација на обвинетите и не содржи нови, непознати докази. Сепак, таа го задолжи Јавното обвинителство да изврши превод на спорните докази од албански на македонски јазик.
„Ова е тест за државата“
Пред почетокот на судењето, атмосферата пред затворот во Идризово беше исполнета со тага и револт. Движењето „Кој е Следен?“ изведе герила акција, барајќи правда.
Родителите на жртвите изразија скептицизам кон правосудниот систем. „Со 20 години затвор не сметаме дека правдата ќе биде задоволена, 63 млади животи се уништени“, изјави Марија, мајка на една од жртвите. Томчо Стојанов, татко на 25-годишно момче кое загина во пожарот, истакна дека овој случај е тест за државата, но дека нема оптимизам, посочувајќи на претходните трагедии како „Ласкарци“ и автобуската несреќа во Бугарија.
Продолжение во вторник
Судијката Груевска Илиевска на самиот старт порача дека секое непотребно одложување ќе биде санкционирано и побара голема дисциплина од сите учесници.
Вчерашната расправа беше прекината во 14:17 часот, за да им се овозможи на обвинетите и бранителите да се запознаат со писмениот примерок од воведните зборови на Обвинителството. Следното рочиште е закажано за наредниот вторник.
