Бројот на граѓани кои пријавуваат финансиски штети од системот Lyoness/MyWorld секојдневно расте, а новите податоци отвораат сериозни прашања за размерите на оваа наводна пирамидална измама во државата. Според најновото соопштение од неформалната група „Анти-Лајонес лоби“ (АЛЛ), станува збор за илјадници оштетени лица кои се подготвени да сведочат и да се приклучат кон правната постапка.
Уништени заштеди, продадени станови и нарушено здравје
Според сведоштвата кои пристигнуваат до здружението, последиците врз граѓаните кои вложувале во овој систем се катастрофални.
- Голем број од оштетените ги вложиле своите животни заштеди.
- Дел од средствата биле обезбедувани преку подигнување кредити, задолжување кај физички лица, па дури и преку продажба на личен имот и станови.
- Се пријавуваат случаи со сериозни последици врз здравствената состојба, психолошки проблеми, нарушени семејни односи, како и случаи каде лицата биле принудени да се иселат во странство поради тешката финансиска состојба во која западнале.
Дел од поранешните маркетери во системот веќе се повлекле, откако самите увиделе дека станува збор за модел кој функционира како класична пирамидална шема.
Енормни суми: 120 милиони евра извлечени од Македонија?
Обемот на финансиските текови фрла ново светло врз начинот на функционирање на Lyoness/MyWorld. Според податоците од меѓународни извори на кои се повикува АЛЛ, низ овој систем глобално поминале над 4 милијарди евра, од кои постои сомнеж дека над 120 милиони евра се уплати направени токму од граѓани на Македонија.
- Само во 2018 година, компанијата исплатила над 152 милиони евра во форма на провизии за своите маркетери.
- Во соопштението директно се посочува поранешниот пратеник Зоран Витанов. Според негова лична изјава, само за месец ноември 2019 година тој платил персонален данок во износ од околу 18.000 евра, што индицира дека неговиот месечен приход за тој период изнесувал приближно 170.000 евра.
Игнорирање на пресудите и континуирано регрутирање
Од „Анти-Лајонес лоби“ особено го истакнуваат фактот дека Витанов интензивно продолжува со регрутирање нови лица и наведување на уплата на средства, дури и по банкротот на компаниите поврзани со „МајВорлд“.
Тие потсетуваат на последната пресуда од судот во Австрија, донесена на 25 јануари 2025 година, со која компанијата и официјално е прогласена за пирамидална шема.
„Ова говори за бескрупулозното однесување на пријавениот во однос на прибавување на материјална корист по секоја цена. Истовремено, со ова би требало да се потврди и сомнежот за умислата во делото за кое е пријавен“, стои во реакцијата на АЛЛ.
Сите граѓани кои се чувствуваат оштетени можат да го пријават својот случај на електронската адреса pravda.myworld.mk@gmail.com, по што ќе добијат инструкции како официјално да се приклучат на пријавата.
