Четвртото издание на Фестивалот на нов европски филм – Beach Film Festival ќе се одржи од 21 до 25 јули во Охрид.
Проекциите ќе бидат на плажата Горица 3, на бродот Армада и во Музејско-културниот центар Лапидариум, додека влезот ќе биде бесплатен на принципот прв дојден, прв услужен.
На овогодинешното филмско издание пубиката ќе има можност да погледне филмови кои патуваат директно од филмските фестивали во Кан, Венеција, Санденс, Берлинале и преку нив да пропатуваат низ 17 различни европски држави.
Организаторите велат дека жирито кое ќе одлучува за наградите во трите официјални категории на долгометражен, краткометражен и студентски филм, како и за наградата Стефан Сидовски Сидо за најдобро актерско остварување ќе биде составено од три члена, Сергеј Трифуновиќ – актер, Ана Василевска – филмски теоретичар/критичар, Елеонора Венинова – сценаристка/режисерка.
Во рамки на фестивалот влегуваат и Специјалните Проекции во чиј склоп ќе биде затворен фестивалот со веќе востановената пракса – прикажување на македонски филм, каде годинава тоа ќе биде филмот Хомо на режисерот Игор Иванов – Изи.
На овогодинешното издание ќе настапуваат шест млади артисти, Хана Корнети, Андреј Татарчевски, Хамбар, Емили, Мартина Пенева и Никола Лошковски, додека едукативната програма годинава ќе се реализира преку две дводневни работилници. Едната за филмска критика чиј ментор ќе биде Ана Василевска и другата за филмска шминка која ќе ја предводи Ирена Сенокозлиоска.
Фестивалот се реализира во соработка со Агенција за филм, Општина Охрид и Музејско Културен Центар Лапидариум.
