Исхраната има огромно влијание врз ризикот од хронични болести и квалитетот на животот. Гостувајќи во емисијата Dhru Purohit Show, докторот Каран Раџан истакна дека еден нутриент е особено важен за долг и здрав живот.
„Не ви се потребни растителни влакна за да преживеете. Но ако сакате да живеете поздраво и подолго – тогаш ви се потребни“, нагласил тој.
Станува збор за прехранбени растителни влакна кои се наоѓаат во растителни намирници како овошје, зеленчук, интегрални житарки и мешунки. Влакна има во брокула, батат, јаболка, шумски плодови, црн грав, леќа, овесни снегулки, кафеав ориз и интегрален леб.
Д-р Раџан истакнува дека постои „изобилство рандомизирани контролирани студии, систематски прегледи и мета-анализи за влакната и пребиотиците“ кои ја покажуваат нивната ефикасност „не само за здравјето на цревата, туку за здравјето на човекот во целина – од здравје на црниот дроб, мозок и когнитивни функции, до здравје на срцето и многу повеќе“. Објаснува дека влакната и пребиотиците го поттикнуваат создавањето кратколанечни масни киселини, кои се „моќни детерминанти на човечкото здравје“, пренесува Daily Express.
Повеќето луѓе не внесуваат доволно влакна
Според д-р Раџан, популациите кои јадат повеќе влакна по правило се поздрави:
„Кога ќе ги споредите луѓето со најголем внес на влакна со оние со најмал внес – првите се поздрави. Имаат подобри метаболни профили и подобри лабораториски резултати.“
Тој додава дека луѓето технички можат да живеат и без влакна, но „квалитетот на животот со текот на времето ќе се влошува“ и ќе се зголеми ризикот од различни хронични болести – „не само физички, туку и ментални“.
Што препорачува здравствената служба?
Националната здравствена служба на Британија (NHS) наведува дека изборот на храна богата со влакна:
помага подолго да се чувствуваме сити,
го подобрува варењето,
може да спречи запек.
И Националната здравствена служба предупредува дека повеќето луѓе не внесуваат доволно влакна и истакнува дека поголемиот внес на влакна е поврзан со помал ризик од:
срцеви заболувања,
мозочен удар,
дијабетес тип 2,
рак на дебелото црево.
Колку влакна треба дневно?
Според официјалните насоки, се препорачуваат околу 30 грама растителни влакна дневно, но возрасните во просек внесуваат околу 20 грама.
Националната здравствена служба советува почесто да се избираат:
житарки богати со влакна (овесни или цели зрна),
интегрален или повеќезрнест леб,
цели зрна како кафеав ориз и интегрална тестенина,
компир со кора,
мешунки,
многу зеленчук,
овошје, јаткасти плодови и семиња.
