Кочо Анѓушев, поранешен вицепремиер за економски прашања и актуелен бизнисмен, најмил лобисти за 1,5 милиони долари во обид да ги ублажи последиците од санкциите воведени против него од страна на САД, пишува 360 степени.
Според јавно достапните регистри, договорите со три различни лобистички компании беа потпишани во текот на последните две години, а се верува дека само еден од нив е раскинат.
Анѓушев, чии санкции беа воведени во декември 2023 година поради обвиненија за корупција, веднаш изрази намера да ја обжали одлуката и да ги искористи сите правни средства за нејзино повлекување. Американскиот Стејт департмент ја оправда својата одлука со тврдењето дека санкциите потврдуваат ангажман на САД во борбата против корупцијата, која ја загрозува јавната безбедност и економскиот развој.
Во одговор на прашањата, од „Фероинвест“, компанијата на Анѓушев, потврдија дека постапките за лобирање во САД се спроведуваат во согласност со американските закони и процедурите на Стејт департментот. Во март 2024 година, Анѓушев формално го регистрираше договорот за лобирање преку компанијата „Рисрч сервис биро“, а меѓу лобистите што работеле за него се Кевин Кери, Пол Хач, Семјуел Морис и Оливер Шерловски.
Активностите на Анѓушев за отстранување на санкциите покажуваат дека лобирањето во САД останува важен инструмент за поранешни и сегашни политички фигури кои се соочуваат со санкции, иако постојат стриктни правила за јавна транспарентност на ваквите договори.
