Одданочувањето на супербогатите за финансирање на климатските акции денес воопшто не звучи како наивна идеја, напротив, за време на бразилското претседавање со Г20 за оваа идеја се водеше сериозна дискусија.
Најбогатите луѓе во светот веројатно веќе го потрошиле својот праведен дел од годишниот глобален буџет за јаглерод, според истражувањето на меѓународната невладина организација Oxfam.
Врз основа на податоци од 2019 година, хуманитарната организација за борба против сиромаштијата проценила дека 77 милиони „супербогати“ луѓе, кои припаѓаат на 1% од најбогатите во светот – а чиј просечен годишен приход е 310.000 долари – трошат 2,1 тон јаглерод диоксид за само десет дена. Наспроти тоа, на најсиромашните 50% од светската популација – нивни 3,9 милијарди – им се потребни речиси три години за да произведат иста количина на загадување.
Според глобалниот буџет за јаглерод, кој го проценува Програмата на Обединетите нации за животна средина, 2,1 тон годишно претставува максимална количина на емисии по човек до 2030 година за да се избегне надминување на глобалното затоплување за 1,5°C.
Вишата советничка за климатска правда во Oxfam GB, Киара Лигуори, изјави: „Иднината на нашата планета виси на конец, а на супербогатите сè уште им се дозволува да ги расфрлаат шансите на човештвото со својот луксузен начин на живот и загадувачки инвестиции.“
„Владите мораат да престанат да попуштаат пред најбогатите загадувачи и наместо тоа да ги натераат да го платат својот праведен дел за хаосот што го создаваат на нашата планета. Лидерите што не преземаат мерки се соучесници во кризата што ги загрозува животите на милијарди луѓе“, додаде таа во соопштението.
