Премиерот Христијан Мицкоски денеска изјави дека тој лично побарал од Министерството за финансии да ја стопира исплатата на парите од ИПАРД. Причината, како што наведе, е да се истражат сите злоупотреби, бидејќи постоеле сомнежи дека тие не се случувале само сега, туку и во минатото. На прашањето дали ЕУ ги блокирала парите, премиерот рече дека тие не се блокирани, туку дека акцијата е поздравена како позитивна од страна на Европската комисија.
„Да, јас тоа го побарав затоа што мораме да видиме до каде одат злоупотребите, затоа што првичните информации велат дека не е тоа само од сега и наназад е правено. Така што се ќе истражиме. Се ќе истражиме и секој што мисли дека така ќе помине се лаже. Има да одговараат сите од прв до последен, кој сака нека е“, изјави Мицкоски.
Оваа изјава на премиерот доаѓа по обвинувањата од СДСМ, од каде тврдат дека штетите врз земјоделците по суспензијата на ИПАРД се огромни. Тие побараа власта да ги објави бројките и да го разреши министерот (за земјоделство) Трипуновски. Портпаролката Богданка Кузеска изјави дека ваквите суспензии може да траат две до три години и оти е прашање дали програмата воопшто ќе продолжи.
„Откако скандалот кој го најави СДСМ се потврди, денес е време власта да почне да одговара на клучните прашања кои ги засегаат и земјоделците и јавноста, но и време е конечно да видиме оставка од Трипуновски кој избегнува одговорност пред јавноста“, рече Кузеска. Таа додаде дека суспендираните средства се 50% грант, додека 50% земјоделците сами ги обезбедуваат за секој проект.
Во меѓувреме, од Канцеларијата на ЕУ во земјава излегоа со став кој ја потврдува верзијата на премиерот – дека одлуката е донесена од домашните власти. Делегацијата на ЕУ соопшти дека „ја поздравува одлуката на националните институции да ги суспендираат сите исплати од ИПАРД III додека не се разјаснат околностите“.
Сепак, од ЕУ додаваат дека побарале дополнителни информации од институциите и оти „ја задржуваат можноста да преземат превентивни мерки за заштита на финансиските интереси на ЕУ“. Тие очекуваат институциите од Северна МакедоMакедонија да постапуваат со „целосна сериозност“ по ова прашање.
Суспензијата следува по корупцискиот скандал во кој актуелниот директор на Платежната агенција, Илија Стоилев, беше фатен како прима поткуп од 400 евра, што била прва рата од ветени 50 илјади евра. Парите, наводно, му ги понудил поранешниот министер за локална самоуправа и правда, Џевдет Насуфи, кој сега е сопственик на агро-фирма во Струга. Стоилев и Насуфи завршија во притвор заедно со уште двајца осомничени, додека петтото осомничено лице е во куќен притвор.
