Повеќе од 1.500 луѓе загинаа во Иран откако започна американско-израелската војна против земјата пред три недели, соопшти во саботата државната радиотелевизија на Исламската Република (IRIB), повикувајќи се на податоци од иранското Министерство за здравство, објави ДПА. Според IRIB, повеќе од 200 од убиените во Иран биле помлади од 18 години. Уште 21.000 луѓе се повредени, објави медиумот во X.
Околу 220 медицински центри се евакуирани, а 21 медицински работник починал, додаде иранската телевизија. Податоците беа објавени откако израелскиот министер за одбрана Израел Кац изјави дека Израел и САД значително ќе ги зголемат нападите врз Иран во наредните денови.
Г-7
На 21 март 2026 година, министрите за надворешни работи на земјите од Г7 изјавија во саботата дека се подготвени да преземат неопходни мерки за поддршка на глобалните резерви на енергија и ја потврдија клучната важност на заштитата на морските патишта, вклучително и Ормутскиот теснец, објави Ројтерс.
„Изразуваме поддршка за нашите партнери во регионот во светлината на неоправданите напади од страна на Исламската Република Иран и нејзините сојузници“, изјавија во заедничка изјава министрите за надворешни работи на Канада, Франција, Германија, Италија, Јапонија, Обединетото Кралство и САД, како и високата претставничка на ЕУ за надворешни работи и безбедносна политика, Каја Калас.
