Еден од најпознатите затвори во Мексико станува туристичка атракција, пренесува CNN.
Затворот се наоѓа на еден од островите Islas Marias и го носи истото име. Островите се наоѓаат во Тихиот Океан, а зградата на затворот е реконструирана и чека посетители.
Претседателот Андрес Обрадор го отвори туристичкиот центар Ислас Маријас во петокот вечерта, со надеж дека ќе го трансформира деценискиот федерален затвор во еколошка атракција и место за љубителите на историјата.
„Ова е туризам за екскурзии, за истражување, за живеење со природата. Да се рекреира историјата, тоа е нешто извонредно, необично“, рече Лопез Обрадор оваа недела.
Островот има вили за сместување на гости, ресторан, кафуле и плажи. Направен е и лак, кој го носи името на Нелсон Мандела, кој помина околу 18 години зад решетки на островот Робен во Јужна Африка пред да биде избран за претседател на државата.
Мандела е „пример дека дури и зад затворските ѕидови, идеалите и промените можат да живеат за оние кои сакаат да ја променат историјата“, соопшти владата на Мексико.
Затворот се наоѓа на околу 100 километри од западната држава Најарит, Ислас Маријас стана затвор во 1905 година под диктаторот Порфирио Дијаз и се користеше до 2019 година кога беше затворен од Лопез Обрадор.
Во затворот имаше многу политички затвореници.
Владата на Мексико најави туристички пакети до островите, а фериботите до главниот град Пуерто Балето почнуваат следната недела. Со центарот ќе управува мексиканската морнарица и е дел од заштитениот биосферен резерват на УНЕСКО.
Мексико ужива туристички бум по пандемијата, при што меѓународните пристигнувања во земјата се зголемени за 56,4% во првите 10 месеци од 2022 година во споредба со истиот период минатата година.
